My 2insana BirthDay!

باختصار كدا وبدون مقدمات، لتاني مرة ح اتكلم عنها في مدونتي العزيزة

بس المرة دي لمناسبة خاصة ألا وهي عيد ميلادها

عيد ميلاد حبيبة قلبي (وبجد حاسة الكلمة دي اوي وانا باكتبها دلوقتي.. حبيبة قلبي)

يمكن بسبب بعد المسافات ما بينا حاليا (القاهرة واسكندرية مشوار بردو.. وتاكسي رايح وتاكسي جاي، شغلانة بقى)

يمكن لأني بقالي كتير ما شفتهاش وكل اللي بينا تليفونات وشات

يمكن بسبب شحتفتي وشحتفة قلبي عليها الفترة اللي فاتت

يمكن بسبب كل دا وأكتر حاساها اوي "حبيبة قلبي"

ويمكن عشان كدا كمان كان نفسي أقولهالها وأقولها "كل سنة وانتي طيبة ياحبيبة قلبي" بطريقة مختلفة تقدر تعبرعن اللي جوايا بجد وأشوف بيها ضحكتها وفرحتها

اتصلت بيا امبارح وماقلتلهاش كل سنة وانتي طيبة في التليفون، ولا حتى كتبتلها ع الوول عندها الفيس بوك

دا بالعكس كمان، كالعادة اتناقرنا حبة ع الفيس بوك على ستيتس كنت كاتباها، وعادي جدا

ولا هزني انه عيد ميلادها، ولا عملت اعتبار للـ 24 سنة اللي رشقت فيهم !! ..

كان نفسي بجد أقولها كل سنة وانتي طيبة بطريقة مختلفة مش زي ماباقولها لأي حد

بس لللأسف، نظرا للظروف السالف ذكرها لم يسعني سوى التعبير هنا في مدونتي المتواضعة ..

إنسانتي العزيزة ،،،

كل سنة وانتي طيبة ياحبيبة قلبي

كل سنة وانتي بألف خير وسعادة

كل سنة وانتي لسه بتضحكيني وباضحكك كل ما نتكلم حتى لو ع الشات

كل سنة واحنا بنضحك من قلبنا كل ما نفتكر ذكرياتنا ومواقفنا ولحظاتنا اللي ما تتنسيش مع بعض

كل سنة وانتي إلى الله أقرب

كل سنة وانتي ربنا راضي عنك وبيحبك ياحبيبة قلبي يارب

كل سنة وانتي اللي تتصلي بيا لما ترنيلي قبل عيد ميلادك بيوم، ومااردش ع الرنة عشان مش معايا كريدت!! (عاااااااااااادي جدا، بتحصل في أحسن العائلات)

كل سنة واحنا مع بعض حتى لو بعاد عن بعض

ويارب ياحبيبتي ربنا يرزقك ويحققلك كل اللي نفسك فيه وتبقي ماما إنسانة عن قريب يااااااااااااااااااااارب.. اللهم آمين

وحشتيني اوي وبحبك اوي :)

"الحمد لله الذي هداني لهذا وما كنت لأهتدي لولا أن هداني الله"